Yana Baxt haqida : Biz bilgan va bilmagan sirlar…

Quyida hayotni xursandchilik, zavqu-shavq, ijobiylik, xotirjamlik hislariga to‘ldiruvchi, ilmiy tomondan asoslangan usullar haqida gap ketgan. Ular bilan tanishgach, hayotingiz yaxshi tomonga o‘zgarishiga shubha yo‘q.

1. Buyumlardan ko‘ra tajribani ko‘proq qadrlang.
   Kornel’sk universiteti professori Tomas Gilovich nima uchun sotib olingan buyumlarga qaraganda, xotira va yoqimli taassurotlarni qadrlashimiz lozimligi borasida bir necha tadqiqotlar o‘tkazdi. Tomas Gilovich “Shaxsiyat va ijtimoiy psixologiya” jurnalida berilgan maqolada keltirilishicha, biz buyumlarimizni begonalarniki bilan solishtirganimizda uni xarid qilganimizdagi hursandchilik yo‘qqa chiqadi. Shundan so‘ng qanday televizor, komp’yuter yoki mashinamiz borligi ahamiyatsiz bo‘lib qoladi. Kimdadir undan yaxshisi bor va biz esa baxtsizmiz. Biroq hayot yo‘limizdagi xotiralar va egallangan tajriba sababli paydo bo‘lan xursandchilik va qanoatni bunday oson yo‘qotib bo‘lmaydi. Tajriba, xotira va taassurot faqat o‘zimizga tegishli. Shu bois ham ular noyob. Ma’naviy boyliklar bizga har safar baxt ulashaveradi.
2. Ijobiy fikr samaraga ta’sir ko‘rsatadi.
   Ijobiy psixologiya mutaxassisi Shon Axorning ta’kidlashicha, baxtli bo‘lishga stress, hayotdagi yoqimsizliklar, pul yetishmovchiligi yoki yo‘qligi va boshqa omillar ta’sir ko‘rsatadi. Baxt davomiyligining 90 foizi atrofdagi olam ta’siriga bog‘liq. Shuningdek, ijobiy fikr dunyoni o‘zgartira oladi. Ijobiy fikr quvvat darajasini, ijodkorlik va shaxsiy samaradorlikni 30 foizga oshiradi. Agar hozirdanoq ijobiy fikrlashni boshlamasangiz, hech qachon boy va mashhur bo‘la olmaysiz.
3. Salbiy fikrlardan qochish kerak.
   Miyamizda salbiy fikrlar qalashib yotibdi va ulardan qochish qiyin. Madrid universitetida o‘tkazilgan tadqiqot natijalariga ko‘ra, bunda eng samarali yo‘l — barcha fikrlarni oq qog‘ozga tushirish va uni yirtib axlat qutisiga uloqtirishdir. Salbiy fikrlar kamayishi bilan ruhiyatingizdagi stress ham kamayadi. Buni bir bora sinab ko‘ring va natijasini sezsangiz doimiy ravishda davom ettiring.
4. Sport!
   Biz hech qachon sport zalidan yomon kayfiyatda chiqayotgan odamni ko‘rmaganmiz. Bu haqda ilmiy faktlar ham bor. Torontodagi universitetda o‘tkazilgan qariyb 25 ta tadqiqotda jismoniy faollik va yaxshi kayfiyatning o‘rtasidagi bog‘liqlik o‘rganildi. Xulosa shuni ko‘rsatdiki, jismoniy faollik depressiya va qo‘rquvni yengishga yordam beradi.
5. Miriqib uxlang.
   Agar to‘yib uxlamagan bo‘lsangiz, kayfiyatingiz yomon bo‘lishi shubhasiz. Yetarli dam olmagan insonda salbiy fikrlar ko‘payib ketadi. Tadqiqotchilar bir necha kun uxlamagan talabalardan so‘zlar ro‘yxatini eslab qolishini so‘rashdi. Eng qizig‘i talabalar salbiy ma’noli so‘zlarni yaxshi (81 foiz) eslab qolishgan. Ijobiy va neytral so‘zlarni eslab qolish ko‘rsatkichi past (31 foiz)ni tashkil etgan.
6. Bugun bilan yashang.
   O‘tmishni unuting, kelajakdan qo‘rqmang. Hozir va shu yerda yashang. Garvard tadqiqotchisi Mett Killingvort biz hozir va shu yerda yashasak baxtli bo‘lishimiz, uzoq o‘tmish va kelajak xayoli bilan band bo‘lsak, o‘zimizni baxtsiz his qilishimizni isbotladi. Bu xulosa 15000 insonni o‘rganish asosida olingan.
7. Minnatdorchilik ro‘yxatini tuzing.
   Minnatdorchilik haqida o‘ylash, odamlardan minnatdor bo‘lish baxtli bo‘lishning eng a’lo yo‘li. Shuning uchun ertalab uyg‘onishingiz bilanoq hozir minnatdor bo‘lishingiz mumkin bo‘lgan uchta narsa haqida o‘ylang. Buni hatto yozib va bunday ro‘yxatni baxt omillaringizni qayta va qayta eslatib turishi uchun saqlab qo‘yishingiz ham mumkin. O‘z juftingizga u borligi uchun ham rahmat ayting. Insonlarga yordam bering. Ularning minnatdorligi ham sizga bir olam ijobiy quvvat beradi.