QIZIQARLI: YUZINGIZGA QARAB BASHORAT QILAMIZ!

Qadim zamonlardanoq odamlar insonning yuziga qarab, uning nimalarga qodirligini o‘qiy olishgan. Kimga hazil, kimga chin, keling, biz ham tashqi ko‘rinishga qarab omadga erishish imkoniyatlarini «bashorat» qilib ko‘ramiz.

Taqdir nishonalari

Bu boradagi mutaxassislar, ya’ni fiziognomistlar inson tashqi ko‘rinishining bir-birini takrorlamaydigan sifatlari o‘zida juda ko‘p qimmatli ma’lumotlarni jamlaganini e’tirof etishadi.

Nafaqat xalqona irimlar, balki zamonaviy fiziognomistlarning hisob-kitoblari ham tanada xolning ko‘p bo‘lishi uning egasi boshqalardan ko‘ra baxtliroq, kar’era borasida omadliroq bo‘lishini ta’kidlaydi. Bunday hisob-kitoblarga ko‘ra:

quloqlardagi xollar pul bilan bog‘liq masalalarda muvaffaqiyatga erishishni bildirarkan.
Lablardagi xollar — muhabbat bobidagi omad belgisi.
Iyakdagi xollar — boylik nishonasi.
Yelkalardagi xollar sizning insonlarni yaxshi ajrata bilishingiz va hayot tashvishlari, jumboqlaridan muvaffaqiyatli o‘ta olishingizni bildiradi.
Bilakdagi xollar — farzand ko‘rishdagi muvaffaqiyatdan darak beradi.
Yanoqlardagi xollar kar’era borasida o‘rtamiyona omadni bildiradi. Bunday insonlarning shaxsiy hayotda ko‘proq baxtli bo‘lishi kutilarkan.
Yuzga qarab… o‘qiymiz!

Baland va keng peshana sohiblariga faoliyatning intellektual sohalarida muvaffaqiyatga erishish uchun barcha shart-sharoit mavjud. Biroz harakat qilsangiz kifoya.
Baland peshanani hoshiyalaydigan sochlarning aylana chizig‘i ko‘pincha mustaqil fe’l-atvor va maqsadga erishishdagi qat’iylik belgisi sanaladi.
Yuzi uzunchoq bo‘lgan kishilar — yaxshi tashkilotchi, ularni boshqaruvchilik lavozimlarida omad kutadi.
Yirik, chaqnab turuvchi ko‘zlar — ijodiy sohada muvaffaqiyatni kafolatlaydigan ijobiy energetika nishonasi.
Biroz qiyshaygan burun — ayyorlik, ustomonlik yordamida kar’era pog‘onasidan ko‘tarilish mumkinligini bildiradi.
To‘g‘ri burun omadga uning sohibini o‘ziga bo‘lgan ishonch va xotirjamlik olib borishini bildiradi.
Ingichka burun — yengiltabiatlik belgisi ekan.

Keng burun esa kar’era haqida orzu qilmaydigan, lekin baxt va muhabbatni topishga qodir ochiqko‘ngil, bag‘rikeng insonlarga xos.
Xizmat pog‘onasidan ko‘tarilish va ko‘ngildagidek nikoh yirik burunli serg‘ayrat va izzattalab insonlarga xos.
Kalta va uchi yumaloq burun egasi ortiqcha asabiylashadigan, qizishib ketadigan bo‘larkan. Bu esa ularning o‘ziga ham, boshqalar bilan munosabatlarda ham xalaqit beradi.
Oyoqlar

Pedomansiya, bu — oyoq barmoqlarining shakli va o‘lchamiga qarab insonning potensial imkoniyatlarini ochib berish san’ati. Unga ko‘ra:

oyoqning uzun, ingichka barmoqlari ko‘zlaganiga erisha oladigan insonlarga xos. Ular nima bilan shug‘ullanmasin — ilmmi, san’atmi yoki tadbirkorlik — barchasida muvaffaqiyat qozona olishadi.
Kalta, qalinligi deyarli bir xil barmoqli insonlar o‘ziga ishonmaydigan, asabiylikka moyil bo‘lishadi. Aynan shuning uchun ularni ko‘pincha omadsizlik va umidsizlik ta’qib etadi.
Qalin barmoqlar sohibining matonat va mehnatsevarlik evaziga muvaffaqiyatga erishishini bildiradi.
Yelpig‘ichni eslatadigan, ya’ni uchlari aylana barmoqlar o‘zini bosa olmaydiganlarga tegishli. Ular har qadamda ziddiyatlarga duch kelishadi. Omadga esa kamdan-kam hollarda erishishadi. Lekin moliyaviy masalalarda ularga havas qilish mumkin.
Oyoq barmoqlari har tomonga tarvaqaylagan insonlar qaysar, odamovi, muvaffaqiyatga faqat o‘z o‘jarligi bilan erishuvchilar hisoblanadi.
O‘ng oyoqdagi uzun va semiz bosh barmoq oilaviy hayotda muvaffaqiyat «va’da qiladi». Bundaylarning muhabbati kuchli, nikohi esa bardavom va mustahkam bo‘ladi.
Qaysi birimizni taqdir siylagan?

Fiziognomistlarning ishonchi komil: quloq chanog‘ining o‘lchami va shakliga qarab nafaqat insonning fe’l-atvorini, hatto uning intilishlarini ham aniqlash mumkin.

Uzunroq o‘sgan solinchak — ta’sirchanlik, tug‘ma faollik, qat’iylik nishonasi. Bunday insonlar xohlaganiga albatta erisha oladi. Lekin ular ko‘pincha atrofdagilarning noroziligi va qarshiligiga duch kelishadi.
Solinchakning yirik eti fe’l-atvor kuchi va muvaffaqiyat qozonish istagidan darak beradi.
Quloq ko‘zlarga nisbatan balandroqda joylashgan bo‘lsa, bu ajoyib belgi. Bunday inson aqlli, tirishqoq, qanday ishga kirishmasin, muvaffaqiyatga erisha oladigan bo‘ladi.
Agar quloqning tepa qismi ko‘zlarga nisbatan pastroqda joylashgan bo‘lsa, bu — o‘rtamiyona natijalarga erishish nishonasi.
Shalpangquloqlik — musiqiy ijodda omadga erishish kaliti hisoblanarkan. Agar farzandingizning qulog‘i shunday bo‘lsa, uni musiqiy maktabga olib boring (albatta agar uning o‘zi ham xohlasa). Balki undan buyuk bastakor, iste’dodli qo‘shiqchi yetishib chiqar.
Uchi uchqur quloq o‘z sohibining uddaburonligi, hiylagarligini bildiradi.
Nima bo‘lganda ham yaxshi narsalarning barchasiga ishoning, o‘zingizda ijobiy xislatlarni rivojlantiring. Salbiylarini esa e’tiborsiz qoldiring. Agar chin dildan harakat qilsangiz, omad sizni ko‘p kuttirmaydi.