Baʼzan turmush oʻrtogʻingiz oʻzini shunday tutadiki, kulishni ham, yigʻlashni ham bilmay qolasiz…
- Uning suhbatlari muhimroq
Oʻzi telefonda soatlab «muhim» narsalar haqida gaplashib oʻtiradi. Lekin siz 10 daqiqadan koʻp gaplashib yuborsangiz, koʻzlari ola-kula boʻlib ketadi. Jahlingiz chiqmasin! Albatta, bu adolatsizlik, fikringizga qoʻshilamiz… Lekin nima ham qilardik —telefonda yotib olib gaplashish ayollarga xos ish degan gap ularning qon-qoniga singib ketgan.
- «Yoqimli» syurpriz
Qahramoningizning bugun kayfiyati yaxshi va siz uchun maxsus qoʻlbola palov damlab bermoqchi! Qanday yaxshi! Lekin oshxona u palov damlagandan keyin bomba portlagan maydonga aylanadi! Stollarning usti, pol va hatto devorlarga ham yogʻ sachragan, ikki kishi uchun toʻrtta lagan, sakkizta likopcha va 10 ta qoshiq ishlatilgan! Eng qizigʻi shef oshpazning nazarida oshni u tayyorlagandan keyin, oshxonani tozalash sizning zimmangizda boʻlishi kerak. Jahl qilishga shoshilmang! Agar oz boʻlsa-da, yigʻishtirishga yordam bersa, yaxshi, agar yordam berishni istamasa, bu kabi syurprizlar sizga unchalik hush kelmasligini taʼkidlab qoʻying…
- Birvarakayiga ikki ish…
Quyidagi manzara barcha ayollarga tanish boʻlsa kerak, aytaylik, turmush oʻrtogʻingiz bilan biror joyga yoʻl oldingiz, kutilmaganda u toʻxtab, qiziq voqeani gapira boshlaydi. Katta koʻchada qaqqayib turmaylik, deb shuncha tortqilasangiz ham joyidan jilmaydi! Jilmaying! Aksariyat erkakalar shunday yaratilgan. Ular ikki ishni birdan qila olishmaydi. +am yurib, ham gaplashish osonmi sizga?
- Yaxshi tomonga oʻzgarishi uchun…
Iflos paypoqlar, futbolkalar… U yechgan narsasini duch kelgan joyga tashlab ketib oʻrgan. Kir kiyimlar hatto vannaxonagacha ham yetib bora olmaydi. Shoshmang! Siz uning enagasimassiz. Agar u oddiy qoidalarga ham rioya kilmas ekan, oʻz holiga qoʻying, toza paypoqlar tugasa, eʼtirozlaringizni oʻylab koʻradi…
- Shoʻrlik bemor
Erkakka va uning salomatligi – odamzotning ochilmagan jumboqlari sirasiga kiradi. Agar unga jiddiy kasalliklar tahdid solib turgan boʻlsa, ogʻriqdan ikki bukchayib qolsa ham, qaysarlik bilan shifokorga borishdan bosh tortib turib oladi. Lekin (Xudo kursatmasin!) tomogʻi ogʻrisa yoki yoʻtalsa bormi… Shu zahoti koʻrpa-toʻshak qilib, inqillab yotib oladi. Uni koʻrib, shamaollagan emas, ogʻir dardga chalingan deb oʻylash mumkin. Ehtiyot boʻling! Albatta uning oh-vohini eshitib, peshanangizni tirishtirishingiz mumkin. Lekin kasalni oʻtkazib yubormay shifokorga borishga koʻndirishingiz kerak. Chunki erkaklar bu vazifani ham, yaʼni oʻz salomatligiga eʼtibor berishni ham ayollarning zimmasiga yuklab qoʻyishgan. Nima ham qilardik….
- Bilimdon maslahati
Bir paytlar maktab davrida arsloningiz futbol oʻynagan va shu sabab hanuz oʻzini sportning eng kuchli bilagʻoni deb hisoblaydi. Har gal futbol matchi boshlanganda televizor qarshisida oʻtirib olib, noshud oʻyinchilarni soʻkib, maslahatlar berib, qichqirayaptimi? Qoʻyavering! Ichidagi yigʻilib qolgan salbiy hislarni shu futbolga toʻkib solsin. Sizga foyda-ku.
- Buyuk tadqiqotchi
Aytaylik, siz kompʼyuterdagi oddiy narsani tushunmadingiz, masalan, bir dasturning yorligʻini «ish stoli»ga chiqarish kerak. Lekin bu «murakkab» ishni bajarish uchun qisqa va tushunarli javob olish imkoniyatingiz yoʻq. Chunki turmush oʻrtogʻingiz shu arzimagan narsani ham qiyin terminlar bilan bir soat tushuntiradi va natijada siz baribir hech nimani tushunmaysiz. Agar antivirus oʻrnatib berishini soʻrasangiz-chi, butun dasturni boshqatdan koʻrib chiqadi. Dahshat… Lekin jahl qilmang. Axir u sizga yaxshi boʻlishini istagandi. Texnika erkak kishida tadqiqotchilik ruhini uygʻotsa, u aybdor emas-ku! Xalaqit bermang, izlanishlarini oxiriga yetkazaversin. Ungacha esa bemalol roʻzgʻor ishlaringizni bajarib kelavering. Oxirida rahmat aytishni ham unutmang.
Shunaqa! Oilam xotirjam boʻlsin desangiz, «arzimagan» narsalarga asabingizni buzib oʻtirmay, murosa qilishni oʻrganing.
Fikr bildirish
Sharhlash uchun siz saytga kirishingiz lozim.