Erkak va qo‘rquv bir-biriga umuman zid tushunchalar, deb o‘ylaymiz. Ammo faqat ahmoqlargina hech narsadan qo‘rqishmaydi. Quyida sanaydiganimiz erkaklarga xos qo‘rquvlar ustida, ular xoh jiddiy bo‘lsin, xoh kulguli, yaxshigina mulohaza yuritib ko‘rish kerak. Chunki yoningizdagi inson — umr yo‘ldoshingizning xatti-harakatlari ko‘pincha ana shu qo‘rquvlar bilan izohlanadi. Demak, suyangan tog‘larimizning yashirin qo‘rquvlarini o‘rganamiz.
Bo‘ysunishni istashmaydi!
Erkak borki, lider bo‘lgisi keladi: oilada, do‘stlari davrasida, ishxonada ham. Bu ularni harakatga keltiruvchi kuch. Erkak doim ustun bo‘lishi kerak, bo‘ysunmasligi lozim, ayniqsa, ayol kishiga. Mayli, bo‘ysunmasinlar, ayollar ham kuchli bir erkak himoyasida bo‘lishni istaydilar va shu tufayli bu ikki jins bir-birini to‘ldiradi. Lekin hayotda hamma narsa bo‘lishi mumkin: ba’zida ishxonada boshliq ayol bo‘lib qolishi yoki xotini yaxshi lavozimga o‘tirib eridan ko‘proq pul topa boshlashi mumkin. Ana shunday o‘rinlarda muammo yuzaga keladi. Na yaxshi maosh, na doimiy ish o‘rni, na oila farovonligi erkaklarning bu qo‘rquviga bas kela olmaydi. Ular injiq, jizzaki, kajbahs bo‘lib qoladilar. Shunday vaziyatlarda ayollarning egiluvchan ruhiyati va farosati kerak: ularni tushuning, qo‘llang, kechiring. Vaqt o‘tishi bilan yo ko‘nikadilar, yo o‘zlari boshqa yaxshiroq ish topadilar.
Hammamiz keksayamiz…
Bu qo‘rquv sabab ancha-muncha taloto‘plar bo‘ladi. O‘rta yosh inqirozi deyishadi buni ruhshunoslar. Yoshi qirq bilan ellikning o‘rtasiga borganda erkak o‘zining qariyotganini anglab qoladi va vahimaga tushadi. Ayniqsa, bu yoshga kelib ishda, moddiy ahvolda biror marrani zabt etmagan, ko‘zga ko‘rinarli natijaga erishmagan erkaklarda bu hol ko‘proq kuzatiladi. Ishxonasiga yaqinda kelgan yosh, aqlli, zamonaviy texnologiyalarga tishi o‘tadigan avlod oldida bir ezilsa, oilada farzandlar tashvishining ortishi, jinsiy munosabatlarning siyraklashuvidan yana bir siqiladilar. Natijada isyon qila boshlaydilar: yana bo‘lar-bo‘lmasga janjallar, chetga yurish, hatto ajrashishlar ro‘y berishi mumkin. Ayollar «erkakcha klimaks» deb nomlanadigan ushbu davrga avvaldan tayyorlanib borishlari, o‘sha payt kelganida esa sabrli bo‘lishlari darkor. Erkakka kuch beradigan, uning o‘ziga nisbatan bahosini oshiradigan — xotini. U sizning ko‘zingiz bilan o‘ziga baho beradi. Demak, u siz uchun olamning markazi, dunyodagi eng zo‘r, navqiron erkak, supermen bo‘lishi kerak. Har holda, unda shunday kayfiyat uyg‘otib bera olsangiz, marra sizniki.
Nozik munosabatlar…
Aynan shu qo‘rquv erkak psixologiyasiga jiddiy zarba yetkazadi. Bu paytda eng katta yordam do‘stlardan emas (chunki, har qanday holda ham uchinchi bir odamning bundan xabardor bo‘lishini istashmaydi), aynan sizdan bo‘lmog‘i kerak. Siz uni sevishingizni, u dunyodagi eng mard va polvon erkak ekanini, hali hammasi oldinda va sizda sabr keragidan ham ortiqligini bildiring. Aslo uyalish, o‘zni chetga olish, bilmaganga solish, befarqlik va hokazo sabablar bilan erkakni o‘z dardi iskanjasida qoldirmang.
Tashlab ketishingizdan vahimada!
Endi yigitlar haqida ham ikki og‘iz gapirsak. Ma’lumki, erkaklar juda g‘ururli bo‘lishadi. Har doim oxirgi so‘zni u aytishi kerak, vaziyatni u boshqarishi lozim, zarur bo‘lsa, munosabatlarni ham o‘zi boshlab, o‘zi tugatishi darkor. Mabodo biror qiz ma’lum muddat uchrashib yurgach, yigit bilan munosabatlarni to‘xtatishni istab qolsa, buni ular o‘z oriyatlari uchun katta zarba sifatida qabul qiladilar. Ularni yo‘qotayotgan muhabbatlari, shu munosabatlarga sarflagan va endi uvol ketayotgan hisssiyotlariyu vaqtlaridan ham ko‘ra ko‘proq toptalgan g‘ururi tashvishlantiradi. Buni hazm qila olmaydilar. Shu sababli ko‘p yigitlar qizlarni birinchi tashlab ketishni istaydilar, muammo chiqsa, darrov aloqalarni uzish payida bo‘ladilar. Bunday erkak bilan oila qurish qiyin, ammo yaxshi inson bo‘lsa, voz kechishga ko‘zingiz qiymasa, yo‘lini topsa bo‘ladi. Avvaldan kelishib oling, muammo chiqsa, siz ham, u ham hech qaerga ketmaysizlar, bir-biringizni tashlamaysizlar, balki gaplashib, hamasini hal qilib olarsizlar. Arazlar, tashlab ketaman deb qo‘rqitishlar bunday erkak bilan teskari natija beradi, u qanchalik sevmasin, o‘z g‘ururidan kecholmaydi, sizdan kechishi osonroq.
Ideal ayolni topolmaslik kompleksi…
Bunday yigitlar uylanguncha ko‘p qizlar bilan gaplashadilar, uylangach ham jufti halollaridan ko‘ngillari to‘lmaydi, yana kimnidir izlaydilar, balki bir necha marta ajrashib uylanishlari ham mumkin. Xullas, ular uchun ayolning o‘zi emas, uni izlash muhimroq. Shu sababli eng chiroyli, eng aqlli, eng pazanda, xullas, eng, eng, eng ayoldan ham ayb topadilar. Axir izlamay qo‘ysalar bo‘lmaydi, yashay olmaydilar-da. Agar chekingizga shunday erkak tushgan bo‘lsa, to o‘zi ideal inson bo‘lmasligini tushunib yetmaguncha sabr qilasiz.
Sochi to‘kila boshladimi?
Bryus Uillis, Zayniddin Zidan… Bu nomlarni eshitsak, ko‘z oldimizga yoqimli, sevimli va mashhur yulduzlar keladi. Ularni birlashtirib turadigan yana bir jihat bor – sochsiz boshlari. Albatta, buni moda, imij, yana allambalo zamonaviy so‘zlar bilan atash mumkin, biroq asl sabab bitta — ularning sochlari bemavrid to‘kila boshlagan. Va buni yashirish uchun birato‘lasiga qirdirib tashlay qolishgan. Er yigit uchun tashqi ko‘rinish emas, ma’naviy jihatlar muhim degan gap qanchalik ko‘p takrorlanmasin, erkaklar kal bo‘lishdan qo‘rqishadi, bu — fakt! Shuning uchun o‘sha mashhur «Kelinlar qo‘zg‘aloni» fil’midagi katta o‘g‘il ham boshiga birnimalarni surkab xotinining muhabbatini qayta qozonmoqchi bo‘ladi. Agar yoringizning sochi to‘kilayotgan bo‘lsa, uni tinchlantirish uchun bir faktni aytsangiz kifoya: olimlarning aniqlashlaricha, erkaklarda soch to‘kilishiga qonda erkak gormoni — testosteron miqdorining ortib ketishi sabab bo‘lar ekan. Albatta, soch to‘kilishining boshqa sabablari ham ko‘p (masalan, ovqat hazm qilish tizimi kasalliklari). Lekin bu jiddiy ichki kasallik bilan bog‘liq emasligiga amin bo‘lsangiz, hammasini testosteronga yo‘yavering — eringiz bundan ko‘ngli tog‘dek ko‘tarilib, sochi to‘kilsa, xursand bo‘ladigan holatga keladi.
Otello kompleksi
Rashk qilmagan erkak erkakmi? Hamma erkaklar juftini qizg‘anadi, ayollar ham. Lekin shunday erkaklar borki, ularda bu tuyg‘u kasallik darajasiga yetgan, bunday erkak bilan yashaydigan ayol muntazam bosim va iskanjada bo‘ladi. Kampirining o‘limini g‘assol ayoldan qizg‘anib qizlariga yuvdirgan chollar haqida ham eshitganmiz. Albatta, rashkchi erlarning ayollari iloji boricha janjal uchun bahona tug‘dirmaslikka, o‘zlarini sipo tutishga intiladilar. Ammo baribir do‘q-po‘pisadan qutula olmaydilar. Bunday erkak oldida boshqa erkaklarni, hatto, yomonlab ham tilga olmaysiz, muhabbatingiz har daqiqada isbotlab turasiz va sabr qilasiz. O‘zga chora yo‘q.
Fikr bildirish
Sharhlash uchun siz saytga kirishingiz lozim.