Agar yurakka buyruq berib bo‘lganida, yer yuzidagi hech bir inson sevgi nashidasini totmasdi. Hammasi biz istagandek bo‘lganida esa hayotning ham, eng muqaddas tuyg‘ularning ham qadri yo‘qolardi
⭕️Anglaganingizdek, bugun «kundaligimiz»da muhabbati armonga aylangan qizlar bilan dardlashamiz.
😡😔To‘y oldi stress
Turmushga chiqayotgan qizlarning deyarli barchasini «Shu inson bilan taqdirimni bog‘lab, to‘g‘ri qilayapmanmi?» degan savol o‘ylantirishi shubhasiz. Muhabbati armonga aylanganlarniku inchinun. Ikkilanishlarga nuqta qo‘yish ham osonmas. Tushunamiz, sizni hozir «Nega bizning muhabbatimiz bunday yakun topti?» degan savol qiynayapti. To‘g‘ri, ota-onangizning talabi va tanlovini ro‘kach qilib ko‘rsatasiz. Ammo aslida hammasi o‘z qo‘llaringizda edi. Sevgan yigitingiz bilan oxirigacha kurashsangizlar, balkim taqdirlaringiz qo‘shilarmidi? Endi esa taqdiringizni tan olishdan boshqa chorangiz yo‘q. Peshanangizga yozilganini qabul qiling, chunki ming qiynalmang, ming urinmang, hukm o‘qildi. Ba’zida bizga istaganlarimiz emas, qismat ravo ko‘rganlari baxt keltiradi.
👰💁Baxtingizni cho‘chitmang!
Sizda qo‘rquv, hadikdan ham ko‘ra ko‘proq norozilik kuchli. Shu sabab baxtli bo‘lishimga ko‘zim etmayapti, deya o‘zingizni jabrdiydaga aylantirayapsiz. Bu kayfiyat, fikr, albatta, boshingizga qo‘nayotgan baxt qushlarini uchirib yuboradi. Hayolingizdan bunday fikrlarning hammasini chiqarib tashlashga harakat qiling. O‘tmishga qarab, kelajak haqida fol ochmang. Yangi hayot ostonasidasiz — ezgu niyatlar bilan u tomonga qadam tashlang. Bo‘lajak kuyovni yaxshi inson deya ta’rifladingiz, u o‘zining fazilatlari bilan qalbingizni zabt etishiga ishoning. Vaholanki, sevgi qissangizning yor-yorga ulanishi baxtli yashashingizga 100 foiz kafolat berolmasdi. Ko‘pchilik bahtli juftliklar ta’kidlaganidek, muhabbat mehnat talab etadi, sinovlarda toblanadi.
👨🙅♂Sobiq yigitni qayg‘urib…
Ko‘pchilik qizlar ahdlashganiga emas, o‘zgaga turmushga chiqayotganida yigitiga achinib, unga bevafolik qilayotgani uchun ota-onasini ayblashadi. Avvalo, ko‘ngil qo‘yganingiz yanada jur’atli bo‘lganida, barmog‘ingizga boshqasi nikoh uzugini taqishiga yo‘l qo‘yib bermasdi. Axir yigitlarning qizlardan ko‘ra bu borada imkoniyatlari ko‘proq va kengroq ekanligini bilamizku! Qolaversa, ota-ona dilbandiga hech zamon yomonlik tilamaydi. Ularni ham, o‘zingizni ham ayblashdan to‘htang. Shunda ko‘nglingizdagi bu muhabbatning cho‘g‘lari asta-sekin o‘chadi. Buning uchun his-tuyg‘ularni jilovlash, irodali bo‘lish lozim. Hadeb ayriliqqa uchraganingiz haqida o‘ylayvermang, iloji boricha bu mavzuda boshqalar (masalan sevgingizdan xabardor dugonangiz bilan) gaplashmang, sobiq yigitingiz bilan vidolashish haqida har xil romantik rejalardan yiroq bo‘ling. Unga ich-ichingizdan baxt tilang. Unutmang, qachonki yuragingiz eski tuyg‘ulardan bo‘shaydi, keyin unga yangisi tashrif buyuradi.
💁👸Kecha radioda xonanda Ulug‘bek Rahmatullaevning «Qirmizi olma» taronasini eshitib qoldim. «To‘ygacha sevgi bir orzu-havas, haqiqiy sevgi keyin bo‘larkan», degan jumlalar bor naqoratida. Siz ham eshitgansiz, hoynahoy.
👰🤵💁 Oppoq kelinlik libosini kiyish arafasida turgan qizlar, qalbingizni to‘y sadolari ostida haqiqiy muhabbat asir etishini tilab qolamiz.
Fikr bildirish
Sharhlash uchun siz saytga kirishingiz lozim.