Psixologik fakt

Kishi turli vaziyatlarda har xil qadam tashlaydi. Psixologlarning aytishicha, qadam tashlash ham ruhiy holatni ko‘rsatadi.

Maqom bilan qadam tashlash yaxshi kayfiyat, istalgan harakatga tayyorlik belgisi. Odatda ko‘pgina yosh qizlar va kibrli-beg‘am kishilar ana shunday bir maqomda chayqalib yurishdan rohatlanishadi.

Bir me’yorda, tekis qadam tashlash – mo‘ljal sari g‘ayrat bilan qilinayotgan harakat. Bunga misol sifatida harbiy xizmatda safda qadam tashlayotgan askarlarni aytish mumkin.

Ritmni buzgan holda qadam tashlayotgan odam o‘zida emas, uning istaklariga qandaydir kuchning xalal berishi uni ikkilanishga yoki ishonchning yo‘qolishiga olib kelgan. Bunday odim kishida o‘ychanlikni, ichki erkinlik yetishmasligini, hadiksirayotganlikni (masalan, darsga tayyor bo‘lmagan o‘quvchining doskaga chiqayotgandagi yurishini eslang) bildiradi.

Ayrim sabablarga ko‘ra, qadamlar tezligi, kengligi, yurganda tana harakati o‘zgarishi mumkin. Asosan ayollarda kiygan oyoq kiyimiga qarab o‘zgaradi.

Keng qadamlar – ishbilarmon, erkin odamlarga xos.

Qisqa, mayda qadamlar – ehtiyotkor, hisob-kitobli, o‘zini tuta biladigan, moslashuvchan odamlarga xos. Sezilarli darajada maydaligi tufayli tez-tez qadam tashlovchi odamlar hovliqma va hurkak bo‘ladi.

Alohida ta’kid bilan keng va sekin qadam tashlash hamisha o‘z kuchini va shaxsiyatini atrofdagilarga namoyish etish istagini bildiradi.

Bo‘shang qadamlar qiziqishning yo‘qligi, befarqlik, umid va javobgarlikni inkor etish, o‘z-o‘zini tergash, tartibga solishning yetishmasligidan darak beradi.

To‘laligicha erkin, ortiqcha harakatlarsiz, tez ham emas, sekin ham emas, katta ham emas, mayda ham emas, bir maromdagi qadam egasi – doimo tinch va o‘ziga ishonadi, nima xohlayotganini yaxshi biladi.

Tebranib yurish – agar har qadamda tananing yuqori qismi tebransa (har oyoq tashlaganida bir u-bir bu yelkasi buriladi) va har qadamida namoyishkorona tabiat sezilsa, bunday odamda o‘zini ko‘rsatish istagi shu qadar kuchliki, oqibatda ko‘r-ko‘rona va yasama harakatlar yuzaga keladi. O‘ziga ishongan, sodda-sezgir odamlar oldinga va orqaga biroz tebranish bilan kuchli ritmli qadam tashlaydilar, o‘zini yaxshi ko‘ruvchi odamlarning yelkasi bir tekisda tebranadi.

Oyoqlarni bir-biriga urib yurish irodasizlik va intilishning yo‘qligi, charchoqlik, sustkashlikni anglatadi.

Og‘ir «mag‘rur» qadam tashlash (mayda qadamlar bilan sekin yuradi; tanasining yuqori qismini o‘ta to‘g‘ri tutadi, biroq ritm yo‘qolib ketadi yoki buziladi) kalondimog‘, o‘zini sevuvchi, o‘ziga yuqori baho beruvchi odamlarga xos.

Notabiiy qadam tashlash beso‘naqay yurish siqiqlik, tashqi hayot bilan munosabatning yetishmasligi, qo‘rqoqlik, erkin ko‘rinishga layoqatsizlik belgisi.

Keskin qadam (sezilarli darajada katta va tez qadamlar, qo‘lning orqa-oldinga tez-tez borib kelishi) – soxta faollikni namoyish etishga bo‘lgan behuda urinishdan darak. Oyog‘ining uchini doimiy yuqoriga ko‘tarib yuradigan kishilarda ideal odam bo‘lib yashashga, aqliy jihatdan ustunlikka intilish kuchli bo‘ladi.