Eringizning puli ortib, mehri kamayib boryaptimi?

1. Qaltis harakatlardan saqlaning. Janjal ko’tarish, har ikki gapning birida «Pul topib, o’zgarib qoldingiz» deya iddao qilish, uydan ketib qolish, boshlig’i yoki biror undan yuqori turuvchi shaxsga aytib, tanobini torttirib qo’yish — bular bari faqat va faqat zararingizga ishlaydi. Eringizning sovigan munosabatini muzlatsa-muzlatadiki, isitmaydi.

2. Shubhaning ortidan quvmang. Erkak ko’proq pul topish uchun ko’proq ishlaydi, do’st-og’aynisi ko’payadi, kutilmagan ishlari, tadbirlari chiqib qoladi. «Puli ko’payib, boshqasini topib olgan bo’lsa-chi?» deya behuda rashkka berilib, ishdan charchab kelgan eringizning hadeb tergov qilavermang.

3. Hamma gap boylikda deb adashmang. Eringiz moddiy imkoniyatlari kengaygach, begona ayolga ilakishib qoldi, deylik. Xo’sh, gap faqat ortiqcha topilayotgan puldami? U nega mehnat qilib topganini ko’chadagi kimgadir sarflayapti? Bilasizmi, erkaklar psixologiyasining o’ziga xos tomoni shundaki, ular doim e’tirof eshitish uchun dovon oshishadi. Ko’chadan uyga nimadir ko’tarib kelganida ayoli xursand bo’lib, minnatdorchilik bildirib, uni maqtab qabul qilganidan ilhomlanadi. Yana-yana harakat qiladi. Agar xotini uning harakatlarini munosib baholay olmasa, rag’batlantirmasa, maqtovga, olqishga bo’lgan ehtiyojini boshqalar orqali qondirish payiga tushadi.

4. Eringizga mos bo’ling. Hech bir erkak arzon ayolni yoqtirmaydi. Hammasi (albatta, johil bo’lmaganlari) yaxshi pul topishni, ayolining ko’nglini olishni, rafiqasi doim chiroyli ko’rinishda bo’lishini istashadi. Sababi, unga ayolining yurish-turishiga qarab baho beriladi. Turmush o’rtog’ingizning qo’li uzayib qolgach, injiqliklari, talablari ortgani kundek ravshan, endi u bir paytlardagidek ko’ylagini o’zi dazmollab ketmaydi. Kiyim javonda hamma kiyimlari taxt bo’lib turishi kerak. Ovqatning sarasini, sharoitning zo’rini istaydi. Siz-chi? Siz ham unga qo’shilib o’zgardingizmi? Yoki «Menga shu ham bo’laveradi» qabilida o’zingizga yaxshi narsalarni ravo ko’rmasdan yuribsizmi? O’sha-o’sha tashqi ko’rinishingizdan charchagan eringizning ko’zlari olma-kesak terib qolmasligiga hech kim kafolat berolmaydi. O’ziga sizni mos ko’rolmay ham tirnog’ingiz ostidan kir qidira boshlaydi. Shunday ekan, u bilan teng rivojlaning. Toki yoringizning yagona ilhom parisi siz bo’ling.